Alegiako Madalena Eliza 1609an azaltzen da lehen aldiz dokumentatua (garai hartan ermita zena).

Altzibarko Eduardo Atinen artxiboa (1927an, handitu aurretik)

Baina lehenagokoa da, XVI. mendekoa baitira hormen beheko zatia eta erdi-puntuko arkua duen portada, ur bedeinkatu ontzia eta Madalenaren taila zaharra ere.

1927koa dira, berriz, hormen goiko zatia, dorrea eta sakristia, alegiarren ahaleginari esker, ermita eliza bihurtu zutenekoa, gaurko itxura emanez.

Eta 2014. urtean zehar Madalena Elizan izan diren hainbat berrikuntzagatik eskerrak emanez, urriaren 19an ospakizun xume baina goxoa izan genuen. Hamaiketan, aurreskua elizatarian dantzatu, eta mezari sarrera txistulariek egin zioten, Iztuetaren “Erreberentzia” doinuaz.

Herriko gaztetxoek meza garaian “Sound of silence” doinuaz Gure Aita organoan, zeharkako txirulez eta kitarraz lagunduta abestu zuten. Alegian lehengo aldia zuen musika taldeak eta zorionduak izan ziren.

Bide batez, organuaren jatorria eredugarria iruditu zitzaigun eta azaldu beharrekoa: orain 15-20 urte, Atsusaingo Maitere Olangaren ekimenez, gabon kanturako taldea eratu eta bildu zen diruarekin erosia omen da. Zoragarria da, nola ez, bere soinua. Larunbatean Elorrik aterarazi zion hots bikain hori.

Elkartasun giroan, hamaiketakoaz gozatu genuen segidan Elkartea betez.

Berritze prozesu guztia, kanpokoa zein barnealdekoa, txosten batean jasoa geratu da, bai Elizan eta baita Altzibarko familiakoen artean, esker onez.