Auzolana

Auzolanik jendetsuena 2017-04-01

2017/04/022017 udaberrikoaAlegia,Auzolana,KizkitzaItsaso, Gipuzkoa Utzi iruzkina

Azken urteotako Auzolanik jendetsuena izan da Udaberriko hau. “Hau da gure herriko altxorra!” zion partaide batek lanak bukatu ondoren talde guztiok Ostatuan elkartu ginenean. Adin guztietako jendea, 55 lagun, eguraldiari beldurrik gabe elkarren artean goxo.

Hainbeste jenderen artean, aurreikusitako lan gehientsuenak burutu ziren eta baita beste batzuk egin ere. Hala ere, batzuei amaiera eman behar zaie oraindik eta beste batzuk azaldu ere azaldu ziren (hurrengotarako):

Atzeko pareta pikatu zen eta raseatzeko geratu da.
Ateak eta leiho guztiak barrutik margotu ziren.
Erretegia konpondu eta teilatua berrikusi zen.
Barruko argi-fokoak aldatu (Led-ak jarri) ziren.
Ezker tranpaleko baranda eta eskailera konpondu ziren.
Tabernako fregadera berritu zen eta apalak hurrengo batean jarriko dira.
Pagadian eroritako pagoa txikitu zen baina euriagatik ez zen egurra eraman.
Kizkitzan aurreikusi gabeko beste lan batzuk ere egin ziren: Altzigarragako iturrirako seinaleak egin, leihoetako barroteak margotu, sakristiakoa atea, zirioaren oina e.a eta antenatik gorako zuhaitzak kimatu.
Alegiako eliza-ataria margotu zen.
Alegiako lorategia desbrozatu eta loreak landatu ziren.
Alegiako plazako hesi apurrak kendu ziren.
Udal informazio-tabloiak jarri ziren (Alegian, Errebueltan, Udaletxean eta Mandubian).
Itsusturri desbrozatu eta landareak sartu ziren.
Udaletxeko balkoiko landareak berritu eta baita elizataria ere lorez apaindu zen.

Elkarlana bukatu ondoren, egindakoa ospatzeko, 21:00etan, Itsasoko Ostatuan Manuk prestatutako afariaren inguruan gehienok elkartuko ginen, familia giroan pozik.

Udazkeneko auzolana Kizkitzan 2015

2015/10/27Auzolana Kizkitzan 2015Auzolana,KizkitzaItsaso, Gipuzkoa Utzi iruzkina

Dakizuenez Itsason hiru auzolan-egun egiten ditugu urtero, udaberrian, udan eta udazkenean.

Aurreko biak S Lorentzo ermitan gauzatu genituen eta udazkeneko honetan, azaroaren 7an, Kizkitzara igo gara eta eguraldi oso ona izan dugu eta aurreikusitako lan guztiak burutu ahal izan ditugu.

Alde batetik, talde bat erretegia konpontzen aritu zen: orain 18 urte egin zen, 1996an, auzolan ikusgarria izan zen hartan, mahaiak jarri ziren aurreko plazan, erretegia eraiki (aurretik egurrezko etxolatxo bat zen, toldoz estaltzen zena), ermita barrutik zuritu eta Laura Esteve margolaria ere etorri zen Donostiatik bere margolana berritzera kolorea emanez (lehen zuri beltzean zen aingerua). Honen berri itsasokoargia blogean duzue: https://itsasokoargia.wordpress.com/category/laura-esteve-kizkitzan/

Kontragoia Oriko txabola ondoan zegoen izeiaz egin zen, Orikoek eskainita.

Argazki hauetan ikus liteke zein hondatuak zeuden kanpaia eta tximiniko hodia:

Eta larunbateko lanaz geroztik honela geratu da:

Beste talde bat pagadian aritu zen, haizeak botatako pagoa moztu, traktorean kargatu eta segidan plazan bertan pitzatu eta erretegirako egur piloa prestatzen. Hemen ikusten dira gaztetxoak indarrean…

Hirugarren taldea tranpalea garbitzen. Taberna gainean jangela den bezalaxe, beste aldean, ermita sarreraren ezkerraldean, eskailerak igoz, beste hainbesteko tokia prestatu zen, bertan jasotako material zaharkitua sutarako egur bihurtuz. Dena txukuntzeaz gain, zorua ere konpondu zen eta bi mahai handi eta eserlekuak prestatuta utzi behar direnerako. Festetan beti ondo etortzen dira babestutako tokiak ere!!

Beste asmoetako bat teilatu zatiren bat garbitzea (hostoek teila erretenak ixten dituzte-eta) baldin bazen ere, Urkulegiko Diosiniok airea botatzen duen makina bizkarrean hartu eta teilatuko hosto guztiak goitik behera jaurti zituen.

Baina izan da beste berrikuntza bat oraingoan: Nazario Maiz lasalletarrak Done Jakue bidean berak egindako harrizko maskorrak jartzen ditu, lekurik esanguratsuenetan (iaz jarri zituen Urteaga Haundian eta baita Mandubiko Bentan ere: https://itsasokoargia.wordpress.com/category/santiago-bidea-itsasotik/ ), eta Kizkitzan jarri nahi zuenez, eguna aprobetxatuko genuen materiala igo eta laguntzeko. Ia berrehun maskor dagoeneko jarriak omen ditu. Esperientzia aberasgarria oraingoa ere eta bihotzez eskerrak!

Arratsaldeko seietako bukatu genituen lanak, dena jaso, bertan mokadutxoa egin eta taldeko argazkia atera ondoren Itsasorako bidea hartu genuen.

Beste talde bat Itsason aritu zen merienda-afaria prestatzen eta gaztainak erretzen, goitik itzuli eta denok batera elizatarian elkartzeko.

Hurrengo lanetarako ideiak jaso eta eztabaidatu… Ondare guztiaren kontserbazioa eta zaintza guztion erantzukizuntzat izateak aukera ematen digu daukagun hori eskaintzeko eta guztion ekarpenez aberasteko.

S. Lorentzon II auzolana 2015-03-28

2015/03/31Auzolana San LorentzonAuzolanaItsaso, Gipuzkoa Utzi iruzkina

“Auzolana: sentitu, pentsatu eta ekin”

Udaberriarekin batera, Itsason aurtengo lehen auzolana burutu dugu, udazkenean hasitakoari jarraipena emanez: S. Lorentzo ermitaren inguruko hesia bukatu, kantoi harriak garbitu, paretako zuloak bete, itxitura barruko belarra moztu eta atea margotu ere egin dugu.

Pareta zuloak hartuta, prest geratu da hurrengo batean karez zuritzeko.

Atea lehen zuen kolore berean margotu dugu. Kolore gris-urdindu hau oraindik gure ondare askotan mantentzen da eta horregatik kontserbatu nahi izan dugu.

Hala ere, teilatua garbitu beharrean dagoela ohartu gara. Inguruetako pinuorriak teila tarte guztiak beterik ditu. Hurrengo ekinaldi batean egun osoko lana izango dugu. Merezi du ermitak duen egur egitura aparta zaintzea.

Eta halakoetan ohi dugun bezala, meriendarekin bukatu dugu: bertara lanera joan ez diren batzuk ere mokadu goxoa bidaliz parte hartu dute. Denok eskertuta!

Eta bukatzeko aipamen berezi bat egin behar da, neguan, beste lan bat ere egin baita: barruko kalbarioaren egonaldiak berritzea. Kamioetxeberriko Juan eta Urkulegikoak aritu dira horretan:

Guzti honekin, barrua ere prest geratu da ostiral santuko Via Crucis-aren azken geldiunea bertan egiteko. Ostiral Santuro Itsason goizeko 10:00etan hasiera ematen zaio eta S Lorentzon amaitu. Garai batean Itsasotik Kizkitzara egiten zen eta handik S Lorentzora jeitsi, ostegunez, gero Itsasoko parrokian funtzioarekin bukatzeko. Hala ere, Madura aldekoek, lehenbizi S Lorentzora (hurbil dute-eta) eta gero Kizkitzatik Itsasora egiten omen zuten (Kataindegikoek esana).